ഒരു മുള്ളൽ കഥ

രണ്ടു മൂന്നു മാസങ്ങൾക്കു മുൻപുള്ള ഒരു രാത്രി...സമയം ഒരു എട്ടുമണി ആയി കാണും..ഞാനും അമ്മുക്കുട്ടിയും എസ്ദാൻ 9 കോമ്പൗണ്ടിൽ ഫ്ലാറ്റിനുള്ളിൽ തനിച്ചാണ്...അപ്പുവും , സിനോജ്ഉം പുറത്തുപോയിരിക്കുന്നു...അമ്മുക്കുട്ടി തൻറെ പതിവ് കലാപരിപാടികളിൽ വ്യാപൃതയാണ്..അതായത്..അവൾക്കു ഞാനൊരു ഗ്ലാസിൽ വെള്ളം കുടിക്കാൻ കൊടുത്തിരുന്നു..ആ വെള്ളം ഒരു ഗ്ലാസിൽ നിന്നും വേറൊരു ഗ്ലാസ്സിലേക്കും തിരിച്ചും ഒഴിച്ചു കൊണ്ടിരിക്കുന്നു,,,ഇനി തറയിൽ പോയ വെള്ളം സ്വന്തം ഉടുപ്പ് കൊണ്ട് വൃത്തിയായി തുടക്കുന്നു...ഈ സംഭവം തന്നെ ആവർത്തിച്ചു കൊണ്ടിരിക്കുന്നു...എന്ത് മനോഹരമായ കളി അല്ലെ...തറയും ഉടുപ്പും മുഴുവൻ നനച്ചാലും കുറച്ചു സമയം നമ്മളെ ശല്യപ്പെടുത്താതെ സ്വയം എന്ജോയ് ചെയ്തു കളിക്കുന്ന കളിയായതു കൊണ്ട് ഞാൻ ചീത്ത പറയാൻ പോകാറില്ല...

അല്പസമയം നീണ്ട ഈ കലാപരിപാടിക്ക് ശേഷം അവളെന്റെ അടുത്ത് വന്നു..ആ ഉടുപ്പൊന്നു മാറികിട്ടണം...ഉടുപ്പ് അപ്പടി നനഞ്ഞു..അതാണാവശ്യം...ഞാൻ അവള് കാണിച്ചു തന്ന ഉടുപ്പ് തന്നെ അവളുടെ കയ്യിൽ കൊടുത്തു അലമാര അടച്ചു സ്വതസിദ്ധമായ ഒരു മന്ദതയോടെ നടന്നെത്തുമ്പോഴേക്കും പുള്ളിക്കാരി അടുത്ത റൂമിലേക്കോടി റൂമിന്റെ ലോക്കുമിട്ടു...

ഇത്തവണ ഞാൻ ശരിക്കും ഒന്ന് ഞെട്ടി...റൂം പൂട്ടി ഉടുപ്പ് മാറി പുറത്തു വരിക എന്നതാണ് അവളുടെ ഉദ്ദേശം...എന്നാൽ ഒരു രണ്ടേ കാൽ വയസ്സുകാരിക്ക് പൂട്ടാൻ പറ്റാത്ത പൂട്ടാണത് ..ഇനീപ്പോ പൂട്ടിയാൽ തന്നെ തുറക്കാൻ അത്ര എളുപ്പമല്ല എന്നതാണ് എന്റെ ആഞ്ഞുള്ള ഞെട്ടലിനു പിന്നിലെ യഥാർത്ഥ ചേതോവികാരം...അവളാണേൽ താനേതോ വലിയ സംഭവം ചെയ്ത മട്ടിൽ ചിരിക്കുന്ന ശബ്ദവും കേൾക്കാം..

ഒരു രണ്ടു മൂന്നു നിമിഷ നേരത്തെ ചിരിക്കും വാതിൽ തുറക്കാനുള്ള വിഫല ശ്രമത്തിനും ശേഷം തനിക്കു അക്കിടി പറ്റിയ കാര്യം അവൾ തന്നെ മനസ്സിലാക്കുകയും ആ ചിരി പതുക്കെ കരച്ചിലിലേക്കു വഴി മാറുകയും ചെയ്തു.....കരച്ചിലിന്റെ താളം മുറുകി വരുന്നു..'അമ്മ വാതിൽ തുറക്ക് എന്ന് പറഞ്ഞാണ് കരച്ചിൽ മുഴുവൻ...ഞാൻ എസ്ദാൻ എമർജൻസി വിളിച്ചു പറഞ്ഞെങ്കിലും അവരെത്താൻ ഒരു പത്തു പതിനഞ്ചു മിനിട്ടെങ്കിലുമെടുക്കും...അമ്മുവാണെങ്കിൽ ഫുൾ ഫോമിൽ നിർത്താതെ കരച്ചിലാണ്...എനിക്ക് തുറക്കാമായിരുന്നിട്ടും ഞാൻ വാതിൽ തുറന്നു കൊടുക്കുന്നില്ല എന്ന മട്ടിലാണ് അവളുടെ കരച്ചിൽ...
അതിനിടെ കരച്ചിലിനിടക്ക് ഒരു പുതിയ ആവശ്യം കൂടി ഉയർന്നു വന്നു...ഉമ്പുള്ളണം(അതായത് മൂത്രമൊഴിക്കണം) എന്നതാണ് പുതിയ ആവശ്യം...

വീട്ടിനുള്ളിൽ ഡയപ്പെർ കെട്ടുന്ന ശീലം ഒഴിവാക്കുന്ന സമയം..അതോണ്ട് അവൾ ഉമ്പുള്ളണം എന്നെങ്ങാനും പറഞ്ഞാൽ അത് മുഴുവൻ പറഞ്ഞുതീരുന്നേനു മുൻപ് തന്നെ ഏതു മലമറിക്കുന്ന പണിടെ ഇടയിലാണേലും ഞാൻ ഓടി ചെന്ന് മുൻപിലുള്ള തടസ്സങ്ങളെല്ലാം ചാടിക്കടന്നു കളിപ്പാട്ടങ്ങൾ കസേര ആദിയായവയെല്ലാം തള്ളിമാറ്റി അവളെയുമെടുത്തു ടോയ്‌ലെറ്റിലേക്കു ഓടുകയാണ് പതിവ്...എന്റെയീ വെപ്രാളവും ഓട്ടവുമെല്ലാം കണ്ടു രസംപിടിച്ചു അമ്മുക്കുട്ടി കയ്യടിച്ചും ചിരിച്ചും ആവോളം പ്രോത്സാഹിപ്പിക്കാറുമുണ്ട്...ഇത്തവണ എന്തായാലും ഒരു രക്ഷയുമില്ല, അവളോട് റൂമിൽ തന്നെ മുള്ളിക്കോളാൻ പറഞ്ഞു...

ഈ സംഭവങ്ങളുടെ ഇടയ്ക്കു വാതിലിന്റെ ഹാന്റിലിന്റെ അടിയിലുള്ള നോബ് പിടിച്ചു തിരിക്കാൻ ഞാൻ അവളോട്‌ പറഞ്ഞുകൊണ്ടിരുന്നു...അവളതു പിടിച്ചു തിരിക്കാൻ ശ്രമിക്കുന്ന ശബ്ദം നമുക്ക് പുറത്തു നിന്ന് കേൾക്കാം..ലോക്ക് പകുതി മാത്രം അടഞ്ഞതു കൊണ്ടോ മറ്റോ അവൾക്കു തന്നെ അവസാനം വാതിൽ തുറക്കാൻ പറ്റി...ഒരു പാട് നാളുകൾക്കു ശേഷം പരസ്പരം കാണുന്നവരെ പോലെ ഞങ്ങൾ കുറച്ചു നേരമെവിടെ പരസ്പരം നിർന്നിമേഷനായി നോക്കി നിൽക്കുകയും , അശ്ലേഷിച്ചും ഉമ്മവെച്ചും സ്നേഹവും ആശ്വാസവും പങ്കു വെയ്ക്കുകയും ചെയ്തു..അപ്പോഴാണ് പെട്ടെന്ന് മൂത്രം തുടച്ചു വൃത്തിയാക്കേണ്ട കാര്യമോർത്തത്‌ ..ഒരു തുണിയെടുത്തു ഞാൻ മുറിയിലെത്തി... മുറി മുഴുവൻ അരിച്ചു പെറുക്കി നോക്കിയിട്ടും ഒരു തരി വെള്ളം പോലും റൂമിലെങ്ങുമില്ല ..പതിയെ ആ സത്യം എന്റെ മുൻപിൽ തെളിഞ്ഞു വന്നു..

അതവളുടെ ഒരു സൂത്രം ആയിരുന്നിരിക്കണം ..അതായത് അവൾ മുള്ളണം ന്നു പറഞ്ഞു വാശിപിടിച്ചപ്പോൾ അവൾ കരുതിയിട്ടുണ്ടാകുക സാധാരണ സിനിമയിൽ കാണുന്ന ഒരു ക്‌ളീഷേ സീനുണ്ടല്ലോ.. വില്ലന്റെ കയ്യിൽ നിന്നും നായികയെ രക്ഷിക്കാൻ വരുന്ന നായകൻ... അത് പോലെ ഞാൻ വാതിലൊക്കെ ചവിട്ടി പൊളിച്ചു അവളേം എടുത്തു കൊണ്ട് പുറത്തേക്കു പോരും എന്നായിരിക്കണം .

ഈ സംഭവത്തിനു ശേഷം ഒരിക്കലും അവൾ വാതിൽ ലോക്ക് ചെയ്യാൻ മെനക്കെടാറില്ല..മാത്രമല്ല ...പലപ്പോഴും വേണ്ട സമയത്തു ബുദ്ധി പ്രയോഗിക്കാൻ കഴിയാത്തതിനാൽ ഒരു പാട് അവസരങ്ങൾ കൈവിട്ടു കളഞ്ഞിട്ടുള്ളതിനാലും അതിൽ ഇച്ചിരി പശ്ചാത്താപങ്ങളൊക്കെയുള്ളതിനാലും ഞാൻ അമ്മുക്കുട്ടിയെ ഒരല്പസ്വൽപം ബഹുമാനം കലർന്ന അസൂയയോടെയൊക്കെ നോക്കാൻ തുടങ്ങിയത് ഈ സംഭവത്തിനു ശേഷമാണ്...